Dr Morgetau haltet sich hartnäckig uf de Metallgländer uf em ehemalige Swissmetal Areal in Dornach. 25. Oktober 2025 9i am Morge, bewaffnet mit Musikboxe verteile sich die einzelne Register in ihri Ecke vom Areal. Probetag, das heisst e neus Lied lerne, an sich nüt neus. Doch hüt liggt e gwüssi Aspannig in dr Luft, denn es isch kei normals Lied wo mir hüt afön z’lerne. Es isch e Medley, e Medley wo viel Ufmerksamkeit vo uns bruche wird. Mit däm Medley lerne uns Lüt kenne, wo uns vorhär no nie khört hän. Es isch s’Medley, wo mir am Glaibasler Charivari 2026 spiele wärde. 6 Minute voller Wächsel, Wächsel im Tempo, Wächsel in dr Stimmig, Wächsel in dr Luutstärki und das, wie sich s’khört bi de Schlössli, sälbstvrständlich uswändig. Es wird konzentriert proobt, Passage vom Lied immer wieder wiederholt. Dr Tau isch em Räge gwiche, sechs Stund Proobe sin scho umme. Mir spiele s'Medley zum erste Mol am Nomidaag zämme. D’Übergäng sin noch chli holprig aber s’Potenzial vo däm Medley isch uf jede Fall sichtbar.

S’Medley begleitet uns jedi Proob ab denn. 150 Minute, so viel Proobe mir jede Mittwuch bis zum 24. Januar 2026, dr Première vom Charivari. Jede Mittwuch 150 Minute vollsti Konzentration, es verlangt viel vo uns ab. S’fühlt sich a wie e Rusch, d'Zyt fliegt. 3. Dezämber 2025, dr ersti Advänt scho hinter uns. E neus Gsicht bsuecht uns hüt in dr Proob. Dr Loris isch us em Content-Team vom Charivari und begleitet uns hüt mit sinere Kamera durch d'Proob. D'Judith, unseri Präsidentin, und dr Däni gän e Interview. D'Lüt lerne uns s’erschte Mol kenne und sehn d’Gsichter zu dr akündigte «Gugge mit perfektem musikalischem Vortrag und sauberem Marsch» wie dr Erik Juillard uns in dr Baz vorgstellt het. Jä, dr Druck wird nit weniger, an de Übergäng wird gschliffe, d' Dynamik wird perfektioniert. Z’sage, dass es immer eifach lauft, wär gloge, es isch asträngend. Immer und immer wieder spiele mir s’Medley. Ab Takt 1, ab Takt 124, ab Takt 76, jedi Passage muess sitze. Jetzt isch es no ei richtigi Proob, ei Stellproob, ei Hauptproob, ei Generalproob und denne isch es am 24. Januar 2025 sowit, d’Première vom 50. Glaibasler Charivari und mir sin mit drbi.

Mir freue uns, wenns los goht!